இன்று... உத்தரகாண்ட்.. நாளை.. ஊட்டி?

ருத்ர தாண்டவம்!

உத்தரகாண்ட்டில் இயற்கை நடத்திய ருத்ர தாண்டவத்தில், பலராலும் கவனிக்கப்பட்டது, வெள்ளத்தில் பாதி மூழ்கிய சிவன் சிலை!

பர்மார்த் நிகேதன் ஆஷ்ரமம் சார்பில் ரிஷிகேஷில் கங்கை ஆற்றங்கரையில் 30 அடி உயரத்தில் சிவன் சிலை ஒன்றை நிறுவியிருந்தனர். இங்கு காலை, மாலை நேரங்களில் பூஜை நடைபெறும். இந்தப் பூஜையை கங்கா ஆர்த்தி என்று வடநாட்டவர்கள் சொல்கின்றனர். இது மனித வாழ்வின் வலி நிவாரணி என்று பக்தர்களால் வர்ணிக்கப்படுகிறது. இந்த பூஜைகளில் பக்தர்கள் கலந்துகொண்டால், எப்படிப்பட்ட பிரச்னைகளும் சிக்கல்களும் தீரும் என்பது ஐதீகம். கடந்த ஆண்டு வெள்ளப் பெருக்கில் தப்பிய இந்த சிலை, இந்த முறை வெள்ளத்தில் அடித்து செல்லப்பட்டுவிட்டது. இதை தெய்வக் குற்றமாகவே வடநாட்டு பக்தர்கள் நினைத்து வருந்துகிறார்கள். இந்தியாவுக்கே ஏதோ ஆபத்து காத்திருக்கிறது என்பதை உணர்த்துகிறது என்பது அவர்களின் எண்ணம்.

வெள்ளப்பெருக்கில் சிக்கித் தவிக்கும் உத்தரகாண்ட் மக்களைக் கண்டு தேசமே பதைபதைக்கிறது. வெள்ளத்தில் சிக்கி நூற்றுக்கணக்கோர் பலி, 5,000-க்கும் மேற்பட்டோர் என்ன ஆனார்​கள் என்றே தெரியவில்லை என்று வரும் தகவல்கள்... வெள்ளப் பாதிப்பின் வீரியத்தை உணர்த்து​கின்றன.  

 கடந்த 17-ம் தேதியில் இருந்து பெரு மழையாகக் கொட்டித் தீர்க்க... உத்தரகாண்ட் வெள்ளக்காடானது. கேதர்நாத், பத்ரிநாத் போன்ற புனிதத்தலங்களுக்கு ஆன்மிக யாத்திரை சென்ற 72 ஆயிரம் பக்தர்கள் சிக்கித் தவிக்கிறார்கள். கேதர்நாத் கோயிலில் மட்டும் 12 ஆயிரம் பக்தர்கள் மாட்டியிருக்கிறார்கள். உத்தர​காண்ட் மாநிலத்தில் பெய்யும் பேய் மழையால் அணைகள் நிரம்பி வழிகின்றன. நதிகளில் வெள்ளக் காடு.

உத்தரகாண்ட் மாநிலத்தில் கங்கோத்ரி செல்லும் வழியில் உத்தரகாசி மாவட்டத்தில் ஒரு பிரமாண்ட கட்டடம் வெள்ளப்பெருக்கில் சிக்கிச் சரிவதை டி.வி-யில் பார்த்திருப்பீர்கள். அந்தக் கட்டட உரிமையாளரை சில வருடங்களுக்கு முன் சந்தித்து எச்சரித்தார் ஸ்ரீதர். 'நதிக்கரையில் இவ்வளவு பெரிய கட்டடத்தை நீங்கள் கட்டுவது தவறு. திடீரென்று இடிந்து விழ வாய்ப்புகள் உண்டு’ என்று சொல்லியும் கேட்கவில்லையாம் அந்தக் கட்டட உரிமையாளர். அதன் விளைவு... இப்போதைய வெள்ளத்தில் பொலபொலவென சரிந்து விழுந்துவிட்டது. உத்தரகாண்ட் மாநிலத்தின் சுற்றுச்சூழல் ஆர்வலர் ஸ்ரீதர், தமிழ்நாட்டுக்காரர். டெல்லி, உத்தரகாண்ட், ஜம்மு-காஷ்மீர் உள்ளிட்ட மாநிலங்களில் சுற்றுச்சூழலைப் பாதுகாக்கும் 'என்விரானிக் டிரஸ்ட்' என்கிற அமைப்பை 1993-ம் ஆண்டு முதல் நடத்திவருகிறார். அவரிடம் பேசினோம்.

''அந்த பில்டிங் மாதிரி பலரும் சட்ட விரோதமான முறையில் கட்டுகிறார்கள். '10 வருடங்கள் இருந்தால் போதும். அதற்குள் காசு பார்த்துவிடுவோம். பிறகு எப்படிப் போனால் என்ன?' என்கிற நினைப்பு அவர்களிடம் இருக்கிறது. இமாச்சலப் பிரதேசம், உத்தரகாண்ட், ஜம்மு-காஷ்மீர் மாநிலங்களில் நிலநடுக்கம், வெள்ளப்பெருக்கு... போன்ற பேரழிவுகள் எந்த நேரமும் ஏற்படலாம். உத்தரகாண்ட் மாநிலத்தில் அலக்நந்தா ஆறும் பாகீரதி ஆறும் இணைந்து கங்கை நதியாக மாறி ஓடுகிறது. 14 ஆறுகள் குறுக்கும் நெடுக்குமாக ஓடுகின்றன. ஆற்றின் கரை ஒரங்களில் 220 மின்சக்தித் திட்டங்கள் மற்றும் சுரங்கத் தொழில்கள் நடக்கின்றன. இந்தத் திட்டங்களுக்காக சில ஆறுகளை 'டணல்' வழியாகத் திசை திருப்பிக் கொண்டுசெல்கிறார்கள். ஏராளமான மரங்கள் வெட்டப்பட்டுள்ளன. இதெல்லாம் இயற்கைக்கு விரோதமானது. இதுமாதிரியான திட்டங்களால்தான் இயற்கை சீற்றம் மக்களைத் தாக்குகிறது. இந்த முறை, பருவ மழை கொஞ்சம் முன்கூட்டியே வந்துவிட்டது. இதை மாநில அரசுகள் எதிர்பார்க்கவில்லை. தேவையான முன்னேற்பாடுகளை செய்யாமல்விட்டதுதான் பயங்கரப் பாதிப்புகள் ஏற்படக் காரணம். 1991-ல் உத்தரகாசி ஏரியாவில் நிலநடுக்கம், 1999-ல் சமோலி ஏரியாவில் ஏற்பட்ட நிலநடுக்கம் ஆகியவை இங்குள்ள மக்களை அதிர்ச்சிக்குள்ளாக்கியது. அதன் பிறகு சில வருடங்கள் கட்டடங்களை உஷாராகக் கட்டினார்கள். பிறகு, வழக்கம்போல் சட்டவிரோதமான முறையில் கட்ட ஆரம்பித்து​விட்டார்கள். மனிதன் இயற்கையை வஞ்சிக்கும்​போது இதுமாதிரிப் பேரழிவுகளை சந்தித்தாக வேண்டியிருக்கிறது. அதற்கு உத்தரகாண்ட் நிகழ்வும் லேட்டஸ்ட் உதாரணம்'' என்று வருத்தத்துடன் சொல்கிறார்.

உத்தரகாண்ட் மாநிலத்தின் டேராடூனில் அதிரடிப் படைப் பிரிவின் எஸ்.எஸ்.பி-யாகப் பணி​புரிகிறார் செந்தில். வெள்ளப்பெருக்கில் சிக்கித் தவிப்பவர்களை மீட்கும் பணியில் ஈடுபட்டுள்ள அவரிடம் பேசினோம். ''மலைப் பகுதிகளில் இருந்து ஓடிவரும் ஆறுகள் அதிகம். இந்த முறை, அந்த ஆற்றில் பனிப் பாறைகள் உடைந்து கலந்துவிட்டதுதான் பெருக்கெடுப்புக்கு ஒரு காரணம். பொதுவாகவே, இங்கே நிலச்சரிவு மழை சீஸனில் அடிக்கடி ஏற்படும். முன்கூட்டியே மழை பெய்ததால், நிலச்சரிவுகளும் அதிகமாக ஏற்பட்டுவிட்டன. இப்போது கேத்ரிநாத் கோயில் ஏரியாவுக்கு மேலே 'மேக வெடிப்பு' என்று சொல்லப்படும் குறுகிய நேரத்தில் மிக அதிக மழை பெய்துள்ளது. மூன்று நாட்கள் ஆகிவிட்ட நிலையில, மீட்புக் குழுவினர் இப்போதுதான் கோயிலை நெருங்கிக்​கொண்டிருக்கிறார்கள். அங்கு ஏற்பட்ட பாதிப்புகள் குறித்து இனிமேல்தான் தெரியவரும்'' என்றார்.

உத்தரகாண்ட் மாநிலத்துக்கு ஏற்பட்டிருக்கும் நிலை, நம் நீலகிரிக்கு வரும் காலம் வெகு தூரத்தில் இல்லை என்று திகில் கிளப்புகின்றனர் சுற்றுச்சூழல் ஆர்வலர்கள்.

ஓசை சுற்றுச்சூழல் அமைப்பின் தலைவர் காளிதாஸ், ''நீலகிரியின் தனித்துவமே நதிகளின் கருவறையாகத் திகழும் சோலைக் காடுகளும் புல்வெளிகளும்தான். ஆங்கிலேயர்கள் தங்களது சுயநலனுக்காக அழித்த நமது காடுகளை சுதந்திரத்துக்குப் பிறகு பேணிப்பாதுகாப்பதற்கு மாறாக, நாமும் மேலும் அழித்தோம். தேயிலைத் தோட்டங்களை உருவாக்கினோம். காய்கறி, பழத்தோட்டம் என்று பணப் பயிர்களை விளைவித்தோம். சட்ட விரோதக் கல்குவாரிகள் மூலம் பாறைகள் வெடிவைத்துத் தகர்க்கப்பட்டன. உலகச் சுற்றுலாத் தலமாக நீலகிரி உருவான பிறகு, வந்துபோகும் மக்களின் வசதிகளுக்கு ஏற்ப நவீன உல்லாச விடுதிகளும் குடியிருப்புகளும் அமைக்க காட்டின் பெரும் பகுதியை சூறையாடிவிட்டோம். காடுகள், புற்கள் போன்றவைதான் மண்ணின் கெட்டித்தன்மையைப் பராமரிக்கிறது. அவை அழிந்துவிட்டதால், நீலகிரி கொஞ்சம் கொஞ்சமாய் மண்ணின் மீதான பிடிமானத்தை இழந்துவிட்டது. அதனால், உத்தரகாண்ட் போன்று இங்கே பெருமழை பெய்தால் ஏற்படும் சேதத்தை நினைத்துப் பார்க்கவே அச்சமாக இருக்கிறது. சூழலியலை உணர்ந்த அதிகாரிகளை நியமித்து, இதற்கு மேலும் நீலகிரி மண் பாதிப்புக்கு உள்ளாகாதவாறு காக்க வேண்டியது அரசின் கடமை'' என்று எச்சரித்தார்.

தமிழக பசுமை இயக்கத்தின் இணைச் செயலாளரான ஜெயச்சந்திரன், ''நீலகிரி மாவட்டத்தில் நிலத்தடி நீரே கிடையாது. ஊற்று நீர்தான் உண்டு. ஆனால், இதைப் புரிந்துகொள்ளாமல் மாவட்ட நிர்வாகத்தினரே போர்களைப் போட்டுவருகிறார்கள். கடந்த சில மாதங்களில் மட்டும் கிட்டத்தட்ட 500 போர்கள் வரை போடப்பட்டிருக்கின்றன. அனைத்திலும் தண்ணீர் வராமல் பயனற்றுப்போய்விட்டன. இருப்பினும் உண்மையைப் புரிந்துகொள்ளாமல் போர் போடுவதைத் தொடர்கின்றனர். அதுபோல், மலைப் பிரதேசங்களில் ஜே.சி.பி-களை உபயோகப்படுத்தக் கூடாது. நில மட்டத்தை சமன்படுத்த ஜே.சி.பி. இயந்திரங்களைப் பயன்படுத்துகின்றனர். இதுபோன்ற செயல்களால், இங்கு நிலநடுக்கம் ஏற்பட வாய்ப்பு அதிகரிக்கிறது. இந்த நிலை மேலும் தொடர்ந்தால், நீலகிரிக்கு பெரும் ஆபத்து காத்திருக்கிறது'' என்று வேதனைப்பட்டார்.

தமிழக அரசு சுதாரித்துக்கொள்ள வேண்டிய தருணம் இது.

- பாலகிஷன், ஆர்.லோகநாதன்

Thanks 

உஷார்! உங்களை வேவு பார்க்கிறார்கள்! பேஸ்புக்,

இளைய தலைமுறையின் இணைபிரியாத ஓர் அம்சமாகிவிட்டது இணையம். உடலின் ஓர் உறுப்புப் போலாகிவிட்டது. ஃபேஸ்புக், ட்விட்டர், யூடியூப், கூகுள் இல்லாமல் ஒரு நாள் கூட இருக்க முடியாது என்கிற அளவிற்கு அதன் மீது, ‘காதல்’ பிறந்து விட்டது.

அவர்களுக்கு இந்தச் செய்தி அதிர்ச்சியாக இருக்கும். நீங்கள் இணையத்தில் எழுதும் ஒவ்வொரு சொல்லும் உங்களுக்குத் தெரியாமலேயே கண்காணிக்கப்படுகிறது. சுருக்கமாகச் சொன்னால், நீங்கள் உளவு பார்க்கப்படுகிறீர்கள்.

அண்மையில் அமெரிக்க ஜனாதிபதி ஒபாமா, அமெரிக்க உளவு நிறுவனங்கள் உலகம் முழுவதும் உள்ள ஃபேஸ்புக் ஸ்டேட்டஸ்கள், தகவல்கள் போன்றவற்றை ஃபேஸ்புக், கூகுள் போன்ற நிறுவனங்களிடமிருந்து பெற்று வருவதாக ஒப்புக் கொண்டிருக்கிறார். இதற்காக அமெரிக்காவின் தேசியப் பாதுகாப்பு ஏஜென்சி (‡National Security Agency), ஒரு தகவல்களைத் தோண்டி எடுக்கும் மென்பொருளைப் பயன்படுத்தியிருக்கிறார்கள். அப்படி 97 பில்லியன் (9,700 கோடி) தகவல்கள் சேகரிக்கப்பட்டுள்ளன.

‘பாதுகாப்பைக் கருத்தில் கொண்டு இந்த நடவடிக்கை மேற்கொள்ளப்படுகிறது. ஆனால் நாங்கள், எங்கள் குடிமக்களை வேவு பார்க்கவில்லை’ என்று அமெரிக்கா நியாயம் சொல்கிறது. அது நமது கவலை இல்லை. ஆனால், வேவு பார்க்கப்பட்ட நாடுகளின் பட்டியலில் இந்தியாவும் இருக்கிறது. ஈரான், பாகிஸ்தான், ஜோர்டான், எகிப்து ஆகியவற்றையடுத்து இந்தியாவும் இடம் பெறுகிறது. இந்தியாவிலிருந்து 6.3 பில்லியன் தகவல்கள் திரட்டப்பட்டுள்ளன.

இப்படி இணையவாசிகளை வேவு பார்ப்பதற்குச் சட்டம் இடமளிக்கிறது என்கிறது அமெரிக்கா. ஆனால், இந்தியச் சட்டங்களின்படி இதற்கு அனுமதியில்லை. எனவே, இதைக் குறித்து இந்தியா கடுமையாகக் கண்டனம் தெரிவிக்கும் என்று இணையவாசிகள் எதிர்பார்த்தார்கள்.

ஆனால், இந்தியா இன்னொரு அதிர்ச்சி அளிக்கிறது. இந்தியாவும் அமெரிக்காவைப் போல இணையவாசிகளை வேவு பார்க்கும் அமைப்பை உருவாக்கவிருக்கிறது.

தேசிய மின்னுலக ஒருங்கிணைப்பு மையம் ‡National Cyber Coordination Centre (NCCC) என்ற ஓர் அமைப்பு. 1,000 கோடி ரூபாயில் உருவாக்கப்படும் இந்த அமைப்பு, மின்னுலகிலிருந்து வரக்கூடிய அச்சுறுத்தல்களை அவை உருவாகும்போதே கண்டறிந்து, நடவடிக்கை எடுக்கத்தக்க அறிக்கைகளையும், முன்னெச்சரிக்கை நடவடிக்கைகளையும் எடுக்கும் என்கிறது இதைப் பற்றிய அரசின் குறிப்பு.

அரசு உருவாக்கவுள்ள இந்தப் புதிய நிறுவனத்தில் அரசின் உளவுத்துறை (IB), ரா போன்ற பல்வேறு அமைப்புகளும் பங்கேற்க உள்ளன. எனவே இதன் நோக்கம், அமெரிக்கா போல அயல்நாட்டவர்களை வேவு பார்ப்பது மட்டும்தானா என்ற கேள்வி எழுந்துள்ளது. இதை தெளிவுபடுத்த வேண்டிய கடமை, அரசுக்கு உண்டு.

ஏற்கெனவே சீனா ஃபேஸ்புக், கூகுள் போன்றவற்றின் வலைத்தளங்களைத் தடை செய்திருக்கிறது. ரஷ்யா, கடந்த மே மாதம் ஃபேஸ்புக்கை தடை செய்ய முயற்சித்தது. பின் அதைக் கைவிட்டு, அதற்கு மாற்றாக VK என்ற சமூக வலைத்தளத்திற்கு ஆதரவளித்தது.

இப்படி ஒவ்வொரு நாடும் தங்களுக்கான சமூக வலைத்தளங்களை உருவாக்கிக் கொள்ளுமானால், இணையம் உலகை இணைக்கும் என்ற கருத்தே பொய்த்துவிடும்,

கருணாநிதியின் பேச்சு!அந்துமணி பா.கே.ப.,

தி.மு.க., தலைவர் கருணாநிதிக்கு, மறைந்த முன்னாள் தலைவர்கள், சரித்திரம் படைத்த அரசர்கள், காவிய நாயகர் - நாயகிகளுக்கு சிலை வடிப்பதில் ஆர்வம் அதிகம். '70களில் அவர் முதல்வர் பதவி வகித்த போது, சென்னை மெரினாவில் பலருக்கும் சிலை எடுத்தார்!
சோழ மன்னன் ராஜராஜனுக்கு, தஞ்சை பெரிய கோவிலினுள் சிலை அமைக்க, 71ம் ஆண்டு முயன்றாராம் கருணாநிதி. ஆனால், அப்போதைய பிரதமர் இந்திராகாந்தி, கோவிலுக்குள் சிலையை வைக்க அனுமதிக்கவில்லையாம். அதனால், கோவிலுக்கு வெளியே சாலை ஓரத்தில் சிலையை வைத்தார் கருணாநிதி என்று, முன்பு எப்போதோ நடுத்தெரு நாராயணன் சார் கூறி இருந்தார் என்னிடம்!
"திண்ணை' பகுதியின், நடுத்தெரு நாரயணன் சாரை சமீபத்தில் சந்தித்தபோது, "ராஜராஜன் சிலை திறப்பு விழாவின் போது, கருணாநிதி ஆற்றிய உரை உங்களிடம் இருந்தால் கொடுங்களேன்...' எனக் கேட்டிருந்தேன். தேடித் தருவதாகச் சொல்லி இருந்தார்.
சமீபத்தில், வேறு எதையோ தேடும்போது, 71ம் ஆண்டு நாளிதழ் பிரதிகளை பார்க்க நேர்ந்தது.
முன்னாள் முதல்வர் கருணாநிதியின் பேச்சு கிடைத்தது. அது:
தஞ்சை பெரிய கோவில், மாமல்லபுரம், கங்கை கொண்ட சோழபுரம் போன்ற கோவில்களை நம்மிடம் ஒப்படைத்தால், இன்னும் சிறப்பாக நம்மால் வைத்திருக்க முடியும். அவைகளை மாநில அரசிடம் ஒப்படைத்தால், இந்திய ஒருமைப்பாடு ஒன்றும் கெட்டு விடாது!
மதுரையில் திருமலை நாயக்கரின் சிலை நிறுவப்பட்டு இருக்கிறது. அதுவும் அம்பிகை இருக்கிற கர்ப்பகிரகத்துக்கு அருகிலேயே இருக்கிறது. மதுரை கோவிலை முழுவதும் அவர் கட்டியதற்கான சரித்திரபூர்வ ஆதாரம் இல்லை.
திருப்பணி செய்தவருக்கே சிலை வைக்கப்பட்டு இருக்கும் போது, பெரிய கோவில் முழுவதையும் கட்டிய ராஜராஜசோழனுக்கு ஏன் உள்ளே சிலை வைக்கக் கூடாது?
சேதுபதிக்கு ராமேஸ்வரத்தில் சிலை வைக்கப்பட்டு இருக்கிறது. ஆனால், ராஜராஜ சோழனுக்குத் தடை! ராஜராஜ சோழனுக்கு சிலை வைக்கப் போவது உறுதி; அதுவும், நாம் நினைக்கிற இடத்தில் வைப்போம்!
— இப்படிப் பேசி இருக்கிறார்; அதை ஒரு படி எடுத்துக் கொண்டேன்.
அடுத்த முறை நாராயணன் சார் ஆபிஸ் வந்த போது, இந்த காப்பியைக் கொடுத்து படிக்கச் சொன்னேன். அவர் படித்து முடித்ததும், "இந்திரா காந்தி தான் மறுத்து விட்டார். அதன் பின், வி.பி.சிங், தேவகவுடா, வாஜ்பாய் அரசுகளில், தி.மு.க., அங்கம் வகித்தது. ஆனால், ராஜராஜன் இன்னும் முச்சந்தியில் தானே நிற்கிறான்... ஏன் சார்...' என அப்பாவியாகக் கேட்டேன்.
"போய் கேட்க வேண்டிய இடத்தில் கேளு... என்னை வம்பில் மாட்டி விடாதே!' என்றபடியே நான் கொடுத்த டீயை குடித்துவிட்டு, நடையைக் கட்டினார்!

வெற்றிக்கு அடிப்படை மனக் கட்டுப்பாடே !

வாழ்வில் ஒருவர் பெறும் வெற்றியானது, அவரின் அறிவுத்திறன் அல்லது கல்லூரியில் அவர் பெறும் மதிப்பெண்களால் மட்டும் நிகழ்வதில்லை. ஒருவரின் சுயகட்டுப்பாடே, வெற்றியை பிரதானமாக தீர்மானிக்கும் அம்சமாக திகழ்கிறது.

பள்ளிப் படிப்பை முடித்து, கல்லூரி வாழ்க்கையில் அடியெடுத்து வைக்கும் ஒருவர், பல்வேறான குழப்பங்களுக்கு ஆளாகிறார். தான் படிக்கும் கல்லூரி, சிறந்ததாக இருக்க வேண்டுமென கருதுகிறார். ஆனால் ஒருவர், எத்தகைய பிரபலம் வாய்ந்த கல்லூரியில் படிக்கிறார் என்பதைவிட, அவர் அங்கே எதை கற்றுக்கொள்கிறார் மற்றும் எப்படி கற்றுக்கொள்கிறார் என்பதே முக்கியம்.

அமெரிக்காவின் ஸ்டான்போர்டு பல்கலையில் நடத்தப்பட்ட ஒரு ஆய்வின்படி, ஒருவர் வாழ்வில் வெற்றியடைய வேண்டுமெனில், அவருக்கு சுய கட்டுப்பாடு மிகவும் முக்கியம் என்ற முடிவு கிடைத்துள்ளது. உங்களின் மிதமிஞ்சிய உணர்வுகளை அடக்கும் சுய கட்டுப்பாட்டு பழக்கமானது, கல்லூரி வாழ்க்கையில் மட்டுமல்ல, உங்களின் ஒட்டுமொத்த வாழ்க்கை முழுவதும், உங்களுக்கு வெற்றியைத் தரும்.

சுய கட்டுப்பாட்டின் சக்தியை நீங்கள் உணர வேண்டுமெனில், Marshmallow டெஸ்ட் பற்றி நீங்கள் தெரிந்துகொள்வது அவசியம். வால்டர் மிஸ்செல் என்ற உளவியல் நிபுணரால், கடந்த 1972ம் ஆண்டு, ஸ்டான்போர்டு பல்கலையில், நடத்தப்பட்ட ஒரு பரிசோதனையே Marshmallow டெஸ்ட். Marshmallow என்பது ஒரு இனிப்பான தின்பண்டம்.

தனது செயல்பாட்டிற்கு, ஒரு வகுப்பறையில், நர்சரி பள்ளி மாணவர்களை அவர் திரட்டினார். வகுப்பின் ஆசிரியர் அந்தக் குழந்தைகள் ஒவ்வொருவருக்கும் அந்த தின்பண்டத்தை வழங்கினார். தின்பண்டங்களைப் பெற்ற குழந்தைகளிடம் ஒரு நிபந்தனை விதிக்கப்பட்டது. அதாவது, வகுப்பின் ஆசிரியை வெளியே சென்று ஒரு சிறு வேலையை முடித்துவிட்டு வருவார். அதுவரை, அத்தின்பண்டத்தை குழந்தைகள் உண்ணலாம் அல்லது ஆசிரியர் வரும்வரை காத்திருக்கலாம். காத்திருக்கும் குழந்தைகளுக்கு, ஆசிரியர் வந்தபின், கூடுதலாக இன்னொரு தின்பண்டம் வழங்கப்படும் என்பதே அந்த நிபந்தனை.

ஆசிரியர் வெளியில் சென்று திரும்பிய பின்னர், குழந்தைகளைப் பார்த்தார். சில குழந்தைகள் தின்று முடித்திருந்தன. சில குழந்தைகளோ, பொறுமையாக காத்திருந்தன.

காத்திருந்த குழந்தைகளை, வளர்ந்து, கல்லூரிப் படிப்பை முடித்து, வேலைக்கு சென்று பணிபுரியும் காலம் வரை, வால்டர் மிஸ்செல் கண்காணித்து வந்தார். சிறுவயதில், அந்த வகுப்பறையில், தின்பண்டத்தை உண்ணாமல் வைத்திருந்து, காத்திருந்த குழந்தைகள், மேல்படிப்பில் சிறந்து விளங்கியதோடு, நல்ல பணிவாய்ப்புகளைப் பெற்று, ஆரோக்கியமான உடல்நலத்தைக் கொண்டிருந்து, மற்றவர்களுடன் நல்ல உறவையும் பேணி வந்தார்கள் என்பதை அவர் கண்டறிந்தார்.

கல்லூரி வாழ்வில் நுழைந்தவுடன், ஒரு புதிய சுதந்திரமான உலகை, இளைஞர்கள் உணர்கிறார்கள். கல்லூரி வாழ்க்கை என்பதே, சந்தோஷமாக ஆடி-பாடி திரிந்து, இன்பமாக இருப்பதற்குத்தான் என்றும், படிப்பது மற்றும் வகுப்பறை நடவடிக்கைகளில் பங்கு கொள்வது அவ்வளவு முக்கியமற்றது என்றும் அவர்கள் நினைத்துக் கொள்கிறார்கள். இதன்மூலம், அவர்களின் தங்களின் எதிர்கால மற்றும் நீண்டகால நலனை பணயம் வைக்கிறார்கள். அவர்களால், தங்களின் மனஉணர்ச்சிகளை கட்டுப்படுத்த முடிவதில்லை. குறுகியகால சந்தோஷங்களுக்காக, நீண்டகால நன்மையை தொலைக்கின்றனர்.

எனவே, ஒவ்வொரு மாணவரும், எப்போதுமே கட்டுப்பாட்டோடு இருக்கப் பழகிக்கொள்ள வேண்டும். இன்னொரு கூடுதல் தின்பண்டத்திற்கு காத்திருக்கும் பண்பானது, எதிர்காலத்தின் மீது நம்பிக்கை வைத்தல் மற்றும் நேர்மறையாக இருத்தல் ஆகிய குணநலன்களை குறிக்கின்றன.

நீங்கள் உங்களுக்குள் நம்பிக்கை வைக்கவில்லையெனில், உங்களுக்கு நல்லது நடக்கும் என்று நம்பவில்லையெனில், உங்களின் வாழ்வில் எதிர்மறை விளைவுகளே ஏற்படும். எதிர்மறை எண்ணங்களை தன்னுள் வளர்த்துக் கொண்டவர்கள், வெற்றிக்கான வாய்ப்புகள், தங்கள் கதவுகளை தட்டும்போது, அதை கவனிக்க தவறிவிடுவார்கள்.

எனவே, அவசரப் புத்தியை கைவிடுங்கள். தேவையற்ற கோபம் மற்றும் உணர்ச்சிகளைக் கட்டுப்படுத்துங்கள். பொறுமையையும், நேர்மறை எண்ணத்தையும் மேம்படுத்திக் கொள்ளுங்கள். நிச்சயமாக, வெற்றி உங்களைத் தேடிவரும்.

''தண்ணி அடிக்கும் இடத்தில் யார் படம் வைப்பது என்று அண்ணிக்குத் தெரியாதா?'' வெளுத்துகட்டும் நாஞ்சில் நம்பத்

'டாஸ்மாக் கடைகளில் ஜெயலலிதா படத்தைத்தான் மாட்ட வேண்டும்’ என்று, பிரேமலதா விஜயகாந்த் கொளுத்திப் போட்டிருக்கும் தீ, அ.தி.மு.க. வட்டாரத்தைக் கொந்தளிக்கவைத்துள்ளது. சென்னை தேனாம்பேட்டையில் நடந்த கூட்டத்தில் பேசிய அ.தி.மு.க. கொள்கை பரப்புத் துணைச் செயலாளர் நாஞ்சில் சம்பத், விஜயகாந்தை திட்டித் தீர்த்தார். அவரைச் சந்தித்தோம். 

'டாஸ்மாக் கடைகளுக்கு 'அம்மா டாஸ்மாக்’ என்று பெயர்சூட்டி முதல்வர் ஜெயலலிதா படத்தை ஒவ்வொரு கடையிலும் வைக்க​வேண்டும்’ என்று, திருப்பூர் கூட்டத்தில் பிரேமலதா விஜயகாந்த் பேசியுள்ளாரே?'

''இதுவரை விஜயகாந்த் மட்டும்தான் பிதற்றி வந்தார். இப்போது பிரேமலதாவும் தொடங்கிவிட்டார்.

நீதியை நிலைநாட்டும் இடங்களில் எல்லாம், மகாத்மா காந்தி படம் இருக்கும். மனிதநேயம் குடியிருக்கும் இடங்களில், மக்கள் திலகம் எம்.ஜி.ஆர். படம் இருக்கும். தன்மானம் உள்ள இடத்தில், தந்தை பெரியார் படம் இருக்கும். தமிழ்நாட்டை நேசிப்பவர்கள் இல்லங்களில், தமிழ்நாடு என பெயர் சூட்டிய அண்ணா படம் இருக்கும். பசித்த வயிற்றுக்கு பால் சோறுபோட்டு அன்னம் பாலிக்கும் இடத்தில் எல்லாம், எங்கள் அன்னபூரணி மாண்புமிகு புரட்சித்தலைவி டாக்டர் அம்மா படம்தான் இருக்கும். சரக்கு விற்கும் இடங்களில் தண்ணி அடிப்பவன் படத்தைத்தான் வைக்க வேண்டும். இதை அண்ணி புரிந்துகொள்வது நல்லது.''

'என் பேச்சு முன்ன, பின்னத்தான் இருக்கும். அதைப்பற்றி எனக்கு கவலை இல்லை. எனக்கு ஜெயிக்கத் தெரியும்’ என்று விஜயகாந்த் பேசியதை கவனித்தீர்களா?'

''அவர் என்ன பேசுகிறார் என்று எதிரில் இருப்பவர்களுக்கே புரியவில்லை. அவர் பேசவில்லை. அவரை ஒரு 'சக்தி’ பேசவைக்கிறது. ஓர் எதிர்க்கட்சித் தலைவர் புள்ளிவிவரங்களை அள்ளிக்கொட்டி ஆதாரங்களை அடுக்கிக்காட்டி ஆளும் அரசாங்கத்தை ஆற்றுப்படுத்த வேண்டும். வெந்ததைத் தின்று வாயில் வந்ததைப் பேசுகிற ஒரு பேட்டை பிஸ்தாவைப் போல, எதிர்க் கட்சித் தலைவர் பேசுகிறார். மக்கள் உன்னிப்பாகக் கவனித்துக்கொண்டுதான் இருக்கிறார்கள். அம்மாவின் ஆட்சி மீது எந்தவிதமான குற்றச்சாட்டுகளையும் சொல்வதற்கு அவருக்கு வக்கும் இல்லை. துப்பும் இல்லை. இவர் எதிர்க் கட்சித் தலைவர் ஆனதே எங்கள் அம்மா போட்ட பிச்சை.

அவருக்கு ஜெயிக்கத் தெரிந்தது ஒரே ஒரு தொகுதியில்தான். அம்மாவின் கருணைப் பார்வையால் 29 இடங்களையும் எதிர்க் கட்சி அந்தஸ்தையும் பெற்றார். 'எனக்கு ஜெயிக்கத் தெரியும்’ என்று அவர் சொல்வதைக் கேட்டு, அவரது கட்சிக்காரர்களே சிரிக்கிறார்கள். நாங்கள் அதை வேடிக்கை பார்க்கிறோம்.''

'வரும் நாடாளுமன்றத் தேர்தலில் விஜயகாந்த் விஸ்வரூபத்தை பார்ப்பீர்கள்  என்கிறாரே? '

''எம்.எல்.ஏ.வாக இருந்தவர், எதிர்க் கட்சித் தலைவர் ஆனது எங்கள் அம்மாவின் விஸ்வரூபம். அகலிகை மீது ராமன் கால்வைத்ததால் சாபவிமோசனம் கிடைத்தது. காக்கையின் மீது அம்மா கால் வைத்ததால், அவர் எதிர்க் கட்சித் தலைவராகிவிட்டார். நாடாளுமன்றத் தேர்தல் இருக்கட்டும். உள்ளாட்சித் தேர்தலில் எங்கே போனார்?

இந்திய அரசியல் வரலாற்றிலேயே ஆளும் கட்சிக்கு 95 சதவீகித வெற்றி கிடைத்தது கடந்த உள்ளாட்சித் தேர்தலில்தான். புரட்சித்தலைவர் எம்.ஜி.ஆர். ஆட்சிக் காலத்தில் கிடைக்காத இந்த வெற்றி, அம்மா ஆட்சிக் காலத்தில் சாத்தியமானது. கட்டிய மனைவிக்காகவும் மச்சானுக்காகவும் மட்டும் கட்சி நடத்துகிற புட்டிப் பேர்வழி, விஸ்வரூபம் எடுப்பதெல்லாம் நடக்கிற காரியமல்ல. கூவம், பாவத்தைப் போக்கினாலும் போக்கும்... கள்ளிப்பால், கண் நோயை நீக்கினாலும் நீக்கும்... ஓலமிடும் கடல், ஊமை ஆனாலும் ஆகும். ஒரு நாளும் இனி தே.மு.தி.க தேறாது. அவர் அகந்தையின் உச்சியில் நின்று ஆரவாரம் செய்கிறார். இந்த மாயாஜாலப் பேர்வழி மண்ணைக் கவ்வும் நாள் வெகுதொலைவில் இல்லை.''

''எதிர்க் கட்சித் தலைவராக விஜயகாந்தின் செயல்பாடு எப்படி?''

''எதிர்க் கட்சித் தலைவர், நிழல் அமைச்சரவைக்குத் தலைமை தாங்குகிறவர். ஆளும் கட்சி கொண்டுவரும் தீர்மானங்களை நிறைவேற்ற ஆரோக்கியமான விவாதங்களை முன்வைக்க வேண்டியவர். ஆனால், இவர் அப்படிச் செய்கிறாரா? முல்லைப் பெரியாறு பிரச்னையில் தமிழகத்தின் உரிமையை விட்டுக்கொடுக்க முடியாது என்று காலத்தால் அழியாத தீர்மானத்தை அம்மா கொண்டுவந்தபோது, அதைக்கூட ஆதரிக்கும் மனோபாவம் இல்லாதவர்.

கோவை கருத்திருமன், பொன்னப்ப நாடார், அகிலமே ஆச்சரியப்படும் மாண்புமிகு அம்மா ஆகியோர் உட்கார்ந்த எதிர்க் கட்சி ஆசனத்தில் எதுவுமே தெரியாத ஒருவர் உட்கார்ந்திருப்பது தமிழகத்துக்கு இழுக்கு. இந்த அழுக்கும் இழுக்கும் எப்போது விலகும் என மக்கள் எதிர்பார்த்துள்ளனர்.''

- எஸ்.முத்துகிருஷ்ணன்

படம்: கே.ராஜசேகரன்